Arooz is now on the App Store, for iPhone and iPad. Download →

All poetry

دکھ فسانہ نہیں کہ تجھ سے کہیں

Ahmad Faraz (1931–2008)

دکھ فسانہ نہیں کہ تجھ سے کہیں

دل بھی مانا نہیں کہ تجھ سے کہیں

آج تک اپنی بیکلی کا سبب

خود بھی جانا نہیں کہ تجھ سے کہیں

بے طرح حال دل ہے اور تجھ سے

دوستانہ نہیں کہ تجھ سے کہیں

ایک تو حرف آشنا تھا مگر

اب زمانہ نہیں کہ تجھ سے کہیں

قاصدا ہم فقیر لوگوں کا

اک ٹھکانہ نہیں کہ تجھ سے کہیں

اے خدا درد دل ہے بخشش دوست

آب و دانہ نہیں کہ تجھ سے کہیں

اب تو اپنا بھی اس گلی میں فرازؔ

آنا جانا نہیں کہ تجھ سے کہیں