عاشقی میں میرؔ جیسے خواب مت دیکھا کرو

عاشقی میں میرؔ جیسے خواب مت دیکھا کرو

باؤلے ہو جاؤ گے مہتاب مت دیکھا کرو

جستہ جستہ پڑھ لیا کرنا مضامین وفا

پر کتاب عشق کا ہر باب مت دیکھا کرو

اس تماشے میں الٹ جاتی ہیں اکثر کشتیاں

ڈوبنے والوں کو زیر آب مت دیکھا کرو

مے کدے میں کیا تکلف مے کشی میں کیا حجاب

بزم ساقی میں ادب آداب مت دیکھا کرو

ہم سے درویشوں کے گھر آؤ تو یاروں کی طرح

ہر جگہ خس خانہ و برفاب مت دیکھا کرو

مانگے تانگے کی قبائیں دیر تک رہتی نہیں

یار لوگوں کے لقب القاب مت دیکھا کرو

تشنگی میں لب بھگو لینا بھی کافی ہے فرازؔ

جام میں صہبا ہے یا زہراب مت دیکھا کرو

ashiqi mein mir jaise khwab mat dekha karo

baole ho jaoge mahtab mat dekha karo

jasta jasta parh liya karna mazamin-e-wafa

par kitab-e-ishq ka har bab mat dekha karo

is tamashe mein ulat jati hain aksar kashtiyan

dubne walon ko zer-e-ab mat dekha karo

mai kade mein kya takalluf mai kashi mein kya hijab

bazm-e-saqi mein adab adab mat dekha karo

ham se darweshon ke ghar ao to yaron ki tarah

har jagah khas khana-o-barfab mat dekha karo

mange tange ki qabaen der tak rahti nahin

yar logon ke laqab alqab mat dekha karo

tishnagi mein lab bhigo lena bhi kafi hai faraz

jam mein sahba hai ya zahrab mat dekha karo