قربت بھی نہیں دل سے اتر بھی نہیں جاتا

قربت بھی نہیں دل سے اتر بھی نہیں جاتا

وہ شخص کوئی فیصلہ کر بھی نہیں جاتا

آنکھیں ہیں کہ خالی نہیں رہتی ہیں لہو سے

اور زخم جدائی ہے کہ بھر بھی نہیں جاتا

وہ راحت جاں ہے مگر اس در بدری میں

ایسا ہے کہ اب دھیان ادھر بھی نہیں جاتا

ہم دوہری اذیت کے گرفتار مسافر

پاؤں بھی ہیں شل شوق سفر بھی نہیں جاتا

دل کو تری چاہت پہ بھروسہ بھی بہت ہے

اور تجھ سے بچھڑ جانے کا ڈر بھی نہیں جاتا

پاگل ہوئے جاتے ہو فرازؔ اس سے ملے کیا

اتنی سی خوشی سے کوئی مر بھی نہیں جاتا

qurbat bhi nahin dil se utar bhi nahin jata

wo shakhs koi faisla kar bhi nahin jata

ankhen hain ke khali nahin rahti hain lahu se

aur zakhm-e-judai hai ke bhar bhi nahin jata

wo rahat-e-jan hai magar us dar badri mein

aisa hai ke ab dhyan idhar bhi nahin jata

ham dohri aziyyat ke giraftar musafir

paon bhi hain shil shauq safar bhi nahin jata

dil ko tiri chahat pe bharosa bhi bahut hai

aur tujh se bichhar jane ka dar bhi nahin jata

pagal hue jate ho faraz us se mile kya

itni si khushi se koi mar bhi nahin jata