کوئی لاکھ تم سے خفا رہے نہ کسی کو خود سے جدا کرو

یہی زندگی کا اصول ہے گلے سب سے بڑھ کے ملا کرو

کبھی راز دل نہ عیاں کرو نہ تو غیر ہی کی سنا کرو

تمہیں جو بھی کہنا ہے شوق سے مرے پاس آ کے کہا کرو

مرے پیٹھ پیچھے رقیب سے کرو یوں نہ راز کی بات تم

جو گلہ ہے مجھ سے اگر کوئی مری بات مجھ سے کہا کرو

بڑی جاں فزا ہے یہ دوستی ذرا دشمنی کا بھی لطف لو

کبھی دشمنوں سے گلے ملو کبھی ان کے حق میں دعا کرو

بھلا بات کوئی یہ بات ہے کہ ہو دل میں کچھ تو زباں پہ کچھ

جو کہا کرو وہ کیا کرو جو کیا کرو وہ کہا کرو