راہ سفر میں آج یہ منظر بھی آئے گا

راہ سفر میں آج یہ منظر بھی آئے گا

گلشن کے ساتھ جلتا ہوا گھر بھی آئے گا

اے ہم سفر ابھی سے سفر کی تکان کیوں

دشت جنوں میں غم کا سمندر بھی آئے گا

بستی جلا رہے ہیں مگر یہ رہے خیال

شعلوں کی زد میں آپ کا یہ گھر بھی آئے گا

تنہائی ہی سہی نہ رکیں راہ میں قدم

منزل نگاہ میں ہو تو رہبر بھی آئے گا

یہ چشم کیف یار تغافل کے ساتھ ساتھ

الزام قتل اب تو ترے سر بھی آئے گا

تو یوں مری وفاؤں کا اب امتحاں نہ لے

میرے لہو سے تر ترا خنجر بھی آئے گا

طوفاں کی سمت لے نہ چلو کارواں ابھی

آندھی کی زد میں ناقۂ رہبر بھی آئے گا

مانا ہے دشت شوق بہت پر خطر ظفرؔ

لیکن وہاں غموں کا یہ خوگر بھی آئے گا

rah-e-safar mein aj ye manzar bhi aega

gulshan ke sath jalta hua ghar bhi aega

ai ham safar abhi se safar ki takan kyun

dasht-e-junun mein gham ka samundar bhi aega

basti jala rahe hain magar ye rahe khayal

sholon ki zad mein ap ka ye ghar bhi aega

tanhai hi sahi na ruken rah mein qadam

manzil nigah mein ho to rahbar bhi aega

ye chashm-e-kaif-e-yar taghaful ke sath sath

ilzam qatl ab to tire sar bhi aega

to yun miri wafaon ka ab imtihan na le

mere lahu se tar tira khanjar bhi aega

tufan ki samt le na chalo karwan abhi

andhi ki zad mein naqa-e-rahbar bhi aega

mana hai dasht-e-shauq bahut pur khatar zafar

lekin wahan ghamon ka ye khugar bhi aega