روکے گا قدم کیوں کر رستے کا خطر میرا

روکے گا قدم کیوں کر رستے کا خطر میرا

جب تک کہ سلامت ہے یہ ذوق سفر میرا

موجوں کے سہارے ہی پا لوں گا میں ساحل کو

کر سکتا نہیں بیڑا غرقاب بھنور میرا

سینچا ہے لہو دے کر جب میں نے چمن اپنا

سوکھے گا بھلا کیسے جذبوں کا شجر میرا

خیر اپنی مناؤ تم اب فکر مری چھوڑو

شیشے کے مکاں والو پتھر ہے جگر میرا

ہے ساری زمیں اپنی ہے سارا جہاں اپنا

دھرتی کا ہر اک ٹکڑا ہے آج نگر میرا

چٹکیں گی یہاں کلیاں مہکے گا چمن سارا

جب دے گا لہو اپنا آکر کے ظفرؔ میرا

rokega qadam kyun kar raste ka khatar mera

jab tak ke salamat hai ye zauq-e-safar mera

maujon ke sahare hi pa lunga mein sahil ko

kar sakta nahin bera gharqab bhanwar mera

sincha hai lahu de kar jab main ne chaman apna

sukhega bhala kaise jazbon ka shajar mera

khair apni manao tum ab fikr miri chhoro

shishe ke makan walo patthar hai jigar mera

hai sari zamin apni hai sara jahan apna

dharti ka har ik tukra hai aj nagar mera

chatkengi yahan kaliyan mahkega chaman sara

jab dega lahu apna akar ke zafar mera