جنوں کی زندگی ناکام کیوں ہے

جنوں کی زندگی ناکام کیوں ہے

وفا کا بے وفائی نام کیوں ہے

سمجھ میں یہ معمہ کیوں نہ آیا

کہ مجھ سے دور تر آرام کیوں ہے

نہیں ہے حسن کی کوئی خطا کیا

ہمیں پر حسن کا الزام کیوں ہے

سکوں حاصل نہیں انسانیت کو

جہاں میں اس قدر کہرام کیوں ہے

چمن کی آبرو کہتے تھے جس کو

پرندہ اب وہ زیر دام کیوں ہے

ابھی آغاز ہے الفت کا یارو

نظر کے سامنے انجام کیوں ہے

انہیں حاصل ہے عادلؔ صبح عشرت

مقدر میں مرے ہی شام کیوں ہے

junun ki zindagi nakam kyun hai

wafa ka be wafai nam kyun hai

samajh mein ye muamma kyun na aya

ke mujh se dur tar aram kyun hai

nahin hai husn ki koi khata kya

hamen par husn ka ilzam kyun hai

sukun hasil nahin insaniyat ko

jahan mein is qadar kohram kyun hai

chaman ki abru kahte the jis ko

parinda ab wo zer-e-dam kyun hai

abhi aghaz hai ulfat ka yaro

nazar ke samne anjam kyun hai

unhen hasil hai adil subh-e-ishrat

muqaddar mein mire hi sham kyun hai