وہ راہبر تو نہیں تھا اعادہ کیا کرتا

وہ راہبر تو نہیں تھا اعادہ کیا کرتا

بنا کے راہ میں وہ کوئی جادہ کیا کرتا

نہا رہا ہو اجالوں کے جو سمندر میں

وہ لے کے ظلمت شب کا لبادہ کیا کرتا

ہر ایک شخص جہاں مصلحت سے ملتا ہو

وہاں کسی سے کوئی استفادہ کیا کرتا

نہ جس میں رنگ نہ خاکہ نہ کوئی عکس جمال

بنا کے ایسی میں تصویر سادہ کیا کرتا

محاذ جنگ میں وہ اپنے فرض کی خاطر

نہ دیتا جان تو آخر پیادہ کیا کرتا

جہاں پہ ہوتا ہو انسانیت کا خوں عارفؔ

میں ایسی دنیا میں رہ کر زیادہ کیا کرتا

wo rahbar to nahin tha iada kya karta

bana ke rah mein wo koi jada kya karta

naha raha ho ujalon ke jo samundar mein

wo le ke zulmat-e-shab ka labada kya karta

har ek shakhs jahan maslahat se milta ho

wahan kisi se koi istifada kya karta

na jis mein rang na khaka na koi aks-e-jamal

bana ke aisi mein taswir sada kya karta

mahaz-e-jang mein wo apne farz ki khatir

na deta jan to akhir piyada kya karta

jahan pe hota ho insaniyat ka khun arif

main aisi duniya mein rah kar ziyada kya karta