نہ چارہ گر نہ مسیحا نہ راہبر تھا میں

نہ چارہ گر نہ مسیحا نہ راہبر تھا میں

نظر میں پھر بھی زمانے کی معتبر تھا میں

انا پہ حرف نہ آ جائے حق پرستوں کی

اٹھائے اپنے ہی نیزے پہ اپنا سر تھا میں

سوال یہ نہیں کس نے کیا تھا قتل مجھے

سوال یہ ہے کہ کیوں خود سے بے خبر تھا میں

جو صبح نو کا اسیری میں دے رہا تھا پیام

وہ انقلاب زمانہ کا نامہ بر تھا میں

سکون دل بھی ملا آبلوں کی لذت بھی

تمہارے ساتھ سفر میں جو ہم سفر تھا میں

ہوئے تھے پست ہواؤں کے حوصلے عارفؔ

جب اپنے کھولے فضاؤں میں بال و پر تھا میں

na chara gar na masiha na rahbar tha main

nazar mein phir bhi zamane ki motabar tha main

ana pe harf na a jae haq paraston ki

uthae apne hi neze pe apna sar tha main

sawal ye nahin kis ne kiya tha qatl mujhe

sawal ye hai ke kyun khud se be khabar tha main

jo subh-e-nau ka asiri mein de raha tha payam

wo inqilab zamana ka nama bar tha main

sukun-e-dil bhi mila ablon ki lazzat bhi

tumhare sath safar mein jo ham safar tha main

hue the past hawaon ke hausle arif

jab apne khole fazaon mein bal-o-par tha main