Arooz is now on the App Store, for iPhone and iPad. Download →

All poetry

ہم ترے شہر میں آئے ترے مہماں بھی رہے

Jagdeesh Masoom

ہم ترے شہر میں آئے ترے مہماں بھی رہے

تجھ کو چاہا بھی مگر تجھ سے گریزاں بھی رہے

اب کہیں دور ہیں ہم تیرے خیالوں سے مگر

ہم ترے شوق کی روداد کے عنواں بھی رہے

پھر ترے پیار کی وہ ساعت رنگیں نہ ملی

گردش وقت سے ہم دست و گریباں بھی رہے

رات بھر کوئی خلش دل کو ستاتی ہی رہی

بند آنکھوں میں کئی خواب پریشاں بھی رہے

بارہا دل کو ہوا ترک تعلق کا جنوں

اور پھر تجھ سے ملاقات کے ارماں بھی رہے

نہ گئی دل کی یہ آشفتہ مزاجی نہ گئی

ہم سلیماں بھی ہوئے بے سر و ساماں بھی رہے

لٹ گئیں جن کے سبب دل کی بہاریں معصومؔ

گلشن دل کے وہی لوگ نگہباں بھی رہے