کیا قصور اے عرض مطلب حسرت پرجوش کا

کیا قصور اے عرض مطلب حسرت پرجوش کا

چشم حیراں کا گلہ ہے یا لب خاموش کا

حیرت آباد تجلی میں نہیں اس دل کا کام

صدمہ پروردہ ہو جو محنت سرائے ہوش کا

تیغ قاتل میں ترے قرباں بڑا احساں کیا

جسم بار اک روح کا تھا سر وبال اک دوش کا

پائے نازک کو ذرا دے رخصت مشق خرام

کب سے تکتی ہے قیامت منہ تری پاپوش کا

ہستیٔ حسن و تغافل پیشگی کا ہے گواہ

جاں بہ لب ہونا تمہارے عاشق مدہوش کا

کم نہ ہوگا شور نوشا نوش صہبا واعظو

دم سلامت چاہیئے امید صہبا نوش کا

kya qusur ai arz-e-matlab hasrat-e-purjosh ka

chashm-e-hairan ka gila hai ya lab-e-khamosh ka

hairat abad-e-tajalli mein nahin is dil ka kam

sadma parwarda ho jo mehnat sarae hosh ka

tegh-e-qatil mein tire qurban bara ehsan kiya

jism bar ik ruh ka tha sar wabal ik dosh ka

pae nazuk ko zara de rukhsat-e-mashq-e-khiram

kab se takti hai qayamat munh tiri paposh ka

hasti-e-husn-o-taghaful peshgi ka hai gawah

jan ba lab hona tumhare ashiq-e-madhosh ka

kam na hoga shor nosha nosh-e-sahba waizo

dam salamat chahiye ummid sahba nosh ka