مجھ سے ملنے میرے خیمے میں چلی آتی ہے گرد

مجھ سے ملنے میرے خیمے میں چلی آتی ہے گرد

دشت وحشت میں فقط میری ملاقاتی ہے گرد

دشت میں بسنا مجھے اس واسطے راس آ گیا

گرد سے مل کر مری ہستی بھی بن جاتی ہے گرد

رائیگانی کا ستاتا ہے مجھے احساس جب

زندگی کا سوچتی ہوں یاد آ جاتی ہے گرد

پھر کوئی وحشت گھمائے دائرہ در دائرہ

گھیر کر جب بھی مجھے صحرا میں لے جاتی ہے گرد

آئنہ یادوں کا اب کھونے لگا ہے آب و تاب

کچھ تو کھائے زنگ اس کو اور کچھ کھاتی ہے گرد

دورئ منزل ہو کم جب خار و خس اٹھنے لگیں

کارواں کے کوچ کا عنوان بن جاتی ہے گرد

جو اکڑ کر چل رہا ہے ایک فرعوں کی طرح

ایسے انساں کو اشارہ اک مکافاتی ہے گرد

سارا دن ہم سات بھٹکیں شام کو تھک ہار کر

ساتھ میرے ہیر وارث شاہ کی گاتی ہے گرد

بس اسی خاطر تبسمؔ مجھ کو یہ بھاتی نہیں

آپ کی تصویر پر روزانہ پڑ جاتی ہے گرد

mujh se milne mere kheme mein chali ati hai gard

dasht-e-wahshat mein faqat meri mulaqati hai gard

dasht mein basna mujhe is waste ras a gaya

gard se mil kar miri hasti bhi ban jati hai gard

raigani ka satata hai mujhe ehsas jab

zindagi ka sochti hun yad a jati hai gard

phir koi wahshat ghumae daira dar daira

gher kar jab bhi mujhe sahra mein le jati hai gard

aina yadon ka ab khone laga hai ab-o-tab

kuchh to khae zang us ko aur kuchh khati hai gard

duri-e-manzil ho kam jab khar-o-khas uthne lagen

karwan ke kuch ka unwan ban jati hai gard

jo akkar kar chal raha hai ek firaun ki tarah

aise insan ko ishara ik mukafati hai gard

sara din ham sat bhatken sham ko thak har kar

sath mere hir waris shah ki gati hai gard

bas isi khatir tabassum mujh ko ye bhati nahin

ap ki taswir par rozana par jati hai gard