نہ رعب جاہ میں آ کر کسی سے گفتگو کی

نہ رعب جاہ میں آ کر کسی سے گفتگو کی

جو ہم نے کی تو پھر اپنی خوشی سے گفتگو کی

ضروری ہو گیا تھا شہر دل برباد کرنا

سو کر کے حوصلہ غارت گری سے گفتگو کی

ادب کی محفلیں کھینچیں ہیں دل لیکن وہاں تو

سبھی تھے بے ادب سو بے دلی سے گفتگو کی

فسانے بے قراری کے سناتی اور کس کو

یہ تیرا غم تھا تیرے ہجر ہی سے گفتگو کی

امیر سلطنت تھا شائبہ تک ہو نہ پایا

کہ اس نے یوں کمال عاجزی سے گفتگو کی

قضا سے مانگ کے مہلت پھر ہم نے پل دو پل کی

یہ پہلی بار تھا جب زندگی سے گفتگو کی

میں لہجے کے فسوں میں گم تھی سو یہ تک نہ سمجھی

کیوں اس نے اب کے اس وارفتگی سے گفتگو کی

نہ راس آئیں جو ہم کو محفلیں شور و شغب کی

تو کنج گل میں جا کر خامشی سے گفتگو کی

دکھائی طور پر میں نے کچھ ایسے ہوشیاری

کہ آنکھیں بند کر کے روشنی سے گفتگو کی

رقم اک داستان صبر ہونے کو تھی لیکن

سمندر نے خود آ کر تشنگی سے گفتگو کی

تبسمؔ کچھ بھرم رکھتیں تعارف ہونے دیتیں

یوں بے خود ہو کے کیوں اس اجنبی سے گفتگو کی

na rob-e-jah mein a kar kisi se guftugu ki

jo ham ne ki to phir apni khushi se guftugu ki

zaruri ho gaya tha shahr-e-dil barbad karna

so kar ke hausla gharat giri se guftugu ki

adab ki mahfilen khinchen hain dil lekin wahan to

sabhi the be adab so be dili se guftugu ki

fasane be qarari ke sunati aur kis ko

ye tera gham tha tere hijr hi se guftugu ki

amir-e-saltanat tha shaiba tak ho na paya

ke us ne yun kamal-e-ajizi se guftugu ki

qaza se mang ke mohlat phir ham ne pal do pal ki

ye pahli bar tha jab zindagi se guftugu ki

main lahje ke fusun mein gum thi so ye tak na samjhi

kyun us ne ab ke is waraftagi se guftugu ki

na ras aen jo ham ko mahfilen shor-o-shaghab ki

tu kunj-e-gul mein ja kar khamushi se guftugu ki

dikhai tur par main ne kuchh aise hoshyari

ke ankhen band kar ke raushni se guftugu ki

raqam ik dastan-e-sabr hone ko thi lekin

samundar ne khud a kar tishnagi se guftugu ki

tabassum kuchh bharam rakhtin taaruf hone detin

yun be khud ho ke kyun is ajnabi se guftugu ki