صباؔ یہ ان سے کہو کہ مجھ پہ نوازشیں بے حساب لکھنا

مرے مقدر میں نیند لکھنا نہ رات لکھنا نہ خواب لکھنا

وہ روشنائی کہاں سے لاؤں میں ایسے کاتب کہاں سے ڈھونڈوں

بہت کٹھن ہے گلاب چہروں پہ داستان عذاب لکھنا

میں دھوپ صحرا میں ڈوب جانے کی آرزو میں تڑپ رہی ہوں

مرے نصیبوں میں پیاس لکھنا قدم قدم پہ سراب لکھنا

تجھے خدائی کا واسطہ ہے مری دعا کی بھی لاج رکھنا

میں تجھ سے عمر دراز مانگوں تو میرے حق میں حباب لکھنا

لو تیری چوکھٹ پہ زندگی کا میں فیصلہ اب کے لے رہی ہوں

تو میرے دست سوال پر اب کوئی نہ کوئی جواب لکھنا

یہاں زمینیں کھسک چکی ہیں ہر ایک گھر اب اجڑ چکا ہے

مرا مکاں ہے ابھی سلامت مجھے بھی خانہ خراب لکھنا