ناؤ کاغذ کی سہی کچھ تو نظر سے گزرے

ناؤ کاغذ کی سہی کچھ تو نظر سے گزرے

اس سے پہلے کہ یہ پانی مرے سر سے گزرے

پھر سماعت کو عطا کر جرس گل کی صدا

قافلہ پھر کوئی اس راہ گزر سے گزرے

کوئی دستک نہ صدا کوئی تمنا نہ طلب

ہم کہ درویش تھے یوں بھی ترے در سے گزرے

غیرت عشق تو کہتی ہے کہ اب آنکھ نہ کھول

اس کے بعد اب نہ کوئی اور ادھر سے گزرے

میں تو چاہوں وہ سر دشت ٹھہر ہی جائے

پر وہ ساون کی گھٹا جیسا ہے برسے گزرے

حبس کی رت میں کوئی تازہ ہوا کا جھونکا

باد و باراں کے خدا میرے بھی گھر سے گزرے

مجھ کو محفوظ رکھا ہے مرے چھوٹے قد نے

جتنے پتھر ادھر آئے مرے سر سے گزرے

nao kaghaz ki sahi kuchh to nazar se guzre

is se pahle ke ye pani mire sar se guzre

phir samaat ko ata kar jaras-e-gul ki sada

qafila phir koi is rah guzar se guzre

koi dastak na sada koi tamanna na talab

ham ke darwesh the yun bhi tire dar se guzre

ghairat-e-ishq to kahti hai ke ab ankh na khol

is ke baad ab na koi aur idhar se guzre

main to chahun wo sar-e-dasht thahar hi jae

par wo sawan ki ghata jaisa hai barse guzre

habs ki rut mein koi taza hawa ka jhonka

bad-o-baran ke khuda mere bhi ghar se guzre

mujh ko mahfuz rakha hai mire chhote qad ne

jitne patthar idhar ae mire sar se guzre