جس کا جی چاہے فقیروں کی دعا لے جائے

جس کا جی چاہے فقیروں کی دعا لے جائے

کل ہمیں جانے کہاں وقت اٹھا لے جائے

خدمت خلق سے ہستی کو فروزاں کر لے

کیا پتہ کون سی ظلمت میں قضا لے جائے

اس لئے کوئی جہاں سے نہ گیا کچھ لے کر

کیا ہے دنیا میں کوئی ساتھ بھی کیا لے جائے

بانٹ دے سب میں یہ خوشیاں جو ملی ہیں تجھ کو

اس سے پہلے کہ کوئی ان کو چرا لے جائے

تو جسے ڈھونڈ رہا ہے وہ ترے اندر ہے

خود سے ملوانے تجھے کون بھلا لے جائے

آندھیاں تو نہ ہلا پائیں تجھے رازؔ مگر

اب اڑا کر نہ کہیں باد صبا لے جائے

jis ka ji chahe faqiron ki dua le jae

kal hamen jane kahan waqt utha le jae

khidmat-e-khalq se hasti ko farozan kar le

kya pata kaun si zulmat mein qaza le jae

is liye koi jahan se na gaya kuchh le kar

kya hai duniya mein koi sath bhi kya le jae

bant de sab mein ye khushiyan jo mili hain tujh ko

is se pahle ke koi un ko chura le jae

tu jise dhund raha hai wo tire andar hai

khud se malwane tujhe kaun bhala le jae

andhiyan to na hila paen tujhe raz magar

ab ura kar na kahin bad-e-saba le jae