مدتوں سوچا کیا کہنے کو کچھ

مدتوں سوچا کیا کہنے کو کچھ

پھر بھی مجھ سے کیا بنا کہنے کو کچھ

جس کے منہ میں ہی زباں ہوتی نہ تھی

آج وہ بھی آ گیا کہنے کو کچھ

ضبط نے مجھ کو نہ کچھ کہنے دیا

درد تھا کب سے اٹھا کہنے کو کچھ

جو بھی آیا منہ میں وہ تم کہہ گئے

تم نے اب چھوڑا ہے کیا کہنے کو کچھ

تم نے جب ترک تعلق کر لیا

کیوں بچاتے ہو بھلا کہنے کو کچھ

وہ ملا لیکن میں کیا کہتا اسے

اس کے آگے تھا ہی کیا کہنے کو کچھ

کب تو گزرے گا ادھر سے اے خدا

میں ہوں صدیوں سے کھڑا کہنے کو کچھ

رازؔ اب کیا پوچھتے ہو موت سے

زندگی نے کیا دیا کہنے کو کچھ

muddaton socha kiya kahne ko kuchh

phir bhi mujh se kya bana kahne ko kuchh

jis ke munh mein hi zaban hoti na thi

aj wo bhi a gaya kahne ko kuchh

zabt ne mujh ko na kuchh kahne diya

dard tha kab se utha kahne ko kuchh

jo bhi aya munh mein wo tum kah gae

tum ne ab chhora hai kya kahne ko kuchh

tum ne jab tark-e-taalluq kar liya

kyun bachate ho bhala kahne ko kuchh

wo mila lekin main kya kahta use

is ke age tha hi kya kahne ko kuchh

kab to guzrega idhar se ai khuda

main hun sadiyon se khara kahne ko kuchh

raz ab kya puchhte ho maut se

zindagi ne kya diya kahne ko kuchh