ہر کوئی شہر میں پابند انا لگتا ہے

ہر کوئی شہر میں پابند انا لگتا ہے

کیا تماشا ہے کہ ہر شخص خدا لگتا ہے

میں نے ہجرت کے بیاباں میں ریاضت کی ہے

اب یہ جنگل مجھے فردوس نما لگتا ہے

دیدۂ شوخ میں دیکھا ہے اتر کر میں نے

حسن پندار ہے پردے میں بھلا لگتا ہے

جب ترے غم سے نکلنے کی نہ صورت نکلے

تیرا وحشی کسی دیوار سے جا لگتا ہے

اس کو سرکار کے بوسے کا شرف حاصل ہے

ورنہ کالا سا یہ پتھر مرا کیا لگتا ہے

اب بھی جاتا ہوں کٹے پیڑ کا سایہ لینے

مدتوں سے جو بھلا تھا سو بھلا لگتا ہے

har koi shahr mein paband-e-ana lagta hai

kya tamasha hai ke har shakhs khuda lagta hai

main ne hijrat ke bayaban mein riyazat ki hai

ab ye jangal mujhe firdaus numa lagta hai

dida-e-shokh mein dekha hai utar kar main ne

husn pindar hai parde mein bhala lagta hai

jab tire gham se nikalne ki na surat nikle

tera wahshi kisi diwar se ja lagta hai

us ko sarkar ke bose ka sharaf hasil hai

warna kala sa ye patthar mira kya lagta hai

ab bhi jata hun kate per ka saya lene

muddaton se jo bhala tha so bhala lagta hai