سچ تو یہ ہے کہ اسے دھوپ نے گرمایا تھا

سچ تو یہ ہے کہ اسے دھوپ نے گرمایا تھا

ہاں وہ پودا جو تری چھاؤں میں کمھلایا تھا

رات کس نے مری تنہائی کو مہکایا تھا

بوئے گل آئی تھی یا تیرا خیال آیا تھا

دیکھنے والے وہ منظر نہیں بھولے اب تک

میں کبھی آپ کی آنکھوں میں نظر آیا تھا

کتنے قصوں کو دیا جنم ترے اشکوں نے

میں بہت خوش تھا کہ دامن مرا کام آیا تھا

کچھ خیال آیا سرابوں میں بھٹکنے والے

کس کی آواز نے دریا پہ تجھے لایا تھا

اب تو بہتر ہے یہی کچھ بھی نہ یاد آئے نعیمؔ

موسم گل میں کسے کھویا تھا کیا پایا تھا

sach to ye hai ke use dhup ne garmaya tha

han wo pauda jo tiri chhaon mein kamhlaya tha

rat kis ne miri tanhai ko mahkaya tha

bu-e-gul ai thi ya tera khayal aya tha

dekhne wale wo manzar nahin bhule ab tak

main kabhi ap ki ankhon mein nazar aya tha

kitne qisson ko diya janam tire ashkon ne

main bahut khush tha ke daman mira kam aya tha

kuchh khayal aya sarabon mein bhatakne wale

kis ki awaz ne dariya pe tujhe laya tha

ab to behtar hai yahi kuchh bhi na yad ae naim

mausam-e-gul mein kise khoya tha kya paya tha