نشاط آرزو کا اور کیا انجام لکھوں گا

نشاط آرزو کا اور کیا انجام لکھوں گا

اسے بھی اک نہ اک دن حسرت ناکام لکھوں گا

مری روداد دل کی ابتدا تم انتہا بھی تم

تمہارا تذکرہ کیسے برائے نام لکھوں گا

قلم کی روشنائی جانے کیا الزام دے مجھ کو

میں اپنی صبح کے اوراق پر جب شام لکھوں گا

کتاب عشق جب بھی زندگی لکھوائے گی مجھ سے

وفا کے باب میں پہلے تمہارا نام لکھوں گا

تری فرقت میں کھویا میں تری قربت میں کیا پایا

نہ یہ تکلیف لکھوں گا نہ وہ آرام لکھوں گا

مری صبحیں خفا ہوں یا ہوں برگشتہ مری شامیں

دیا ہے دوپہر نے جو مجھے انعام لکھوں گا

سر مژگاں جو اختر بن کے چمکے تھے نعیم اخترؔ

میں اپنی زندگی ان آنسوؤں کے نام لکھوں گا

nishat-e-arzu ka aur kya anjam likhunga

use bhi ik na ik din hasrat-e-nakam likhunga

miri rudad dil ki ibtida tum intiha bhi tum

tumhara tazkira kaise bara-e-nam likhunga

qalam ki raushnai jane kya ilzam de mujh ko

main apni subh ke auraq par jab sham likhunga

kitab-e-ishq jab bhi zindagi likhwaegi mujh se

wafa ke bab mein pahle tumhara nam likhunga

tiri furqat mein khoya mein tiri qurbat mein kya paya

na ye taklif likhunga na wo aram likhunga

miri subhen khafa hun ya hun bargashta miri shamen

diya hai dopahar ne jo mujhe inam likhunga

sar-e-mizhgan jo akhtar ban ke chamke the naim akhtar

main apni zindagi un ansuon ke nam likhunga