تصور میں سلام آتے رہیں گے

تصور میں سلام آتے رہیں گے

محبت کے پیام آتے رہیں گے

کمی ممکن نہیں ہے بام و در کی

نظر ماہ تمام آتے رہیں گے

نگاہوں سے ملیں گی جب نگاہیں

تو خود گردش میں جام آتے رہیں گے

کشش ان میں اگر ہوگی ذرا سی

پرندے زیر دام آتے رہیں گے

شب فرقت شب فرقت نہ ہوگی

تصور کچھ تو کام آتے رہیں گے

وقار شعر و فن بڑھتا رہے گا

اگر کچھ خوش کلام آتے رہیں گے

بجاجؔ ان کو جو روکے گا زمانہ

وہ خوابوں میں مدام آتے رہیں گے

tasawwur mein salam ate rahenge

mohabbat ke payam ate rahenge

kami mumkin nahin hai bam-o-dar ki

nazar mah-e-tamam ate rahenge

nigahon se milengi jab nigahen

tu khud gardish mein jam ate rahenge

kashish un mein agar hogi zara si

parinde zer-e-dam ate rahenge

shab-e-furqat shab-e-furqat na hogi

tasawwur kuchh to kam ate rahenge

waqar-e-sher-o-fan barhta rahega

agar kuchh khush kalam ate rahenge

bajaj un ko jo rokega zamana

wo khwabon mein mudam ate rahenge