کیا طرز تبسم ہے کہ تحریر لگے ہے

کیا طرز تبسم ہے کہ تحریر لگے ہے

بدلا ہوا تیور مری تقدیر لگے ہے

کیوں دیکھ لیا وقت سفر پیار سے تم نے

ہر تار نظر پاؤں کی زنجیر لگے ہے

آنسو کی زباں کچھ نہیں یہ خود ہی زباں ہے

آ جائے روانی پہ تو تقریر لگے ہے

ہے شوق جنوں خیز کا ادنیٰ یہ کرشمہ

ہر شے سے ابھرتی تری تصویر لگے ہے

نشہ ہے تو اک نشہ ہے مستی ہے تو مستی

دل اہل خرابات کی جاگیر لگے ہے

صیاد کا یہ طرز تغافل بھی عجب ہے

تاکے ہے ادھر اور ادھر تیر لگے ہے

ہوتا نہیں اے چاندؔ اثر آہ کا ان پر

اس میں کوئی تقدیر کی تاخیر لگے ہے

kya tarz-e-tabassum hai ke tahrir lage hai

badla hua tewar miri taqdir lage hai

kyun dekh liya waqt-e-safar pyar se tum ne

har tar-e-nazar paon ki zanjir lage hai

ansu ki zaban kuchh nahin ye khud hi zaban hai

a jae rawani pe to taqrir lage hai

hai shauq junun khez ka adna ye karishma

har shai se ubharti tiri taswir lage hai

nasha hai to ik nasha hai masti hai to masti

dil ahl-e-kharabat ki jagir lage hai

sayyad ka ye tarz-e-taghaful bhi ajab hai

take hai idhar aur idhar tir lage hai

hota nahin ai chand asar ah ka un par

is mein koi taqdir ki takhir lage hai