دے تبسم کی خیرات ماحول کو ہم کو درکار ہے روشنی یا نبی

دے تبسم کی خیرات ماحول کو ہم کو درکار ہے روشنی یا نبی

ایک شیریں جھلک ایک رنگیں ڈلک تلخ و تاریک ہے زندگی یا نبی

اے نوید مسیحا تری قوم کا حال عیسیٰ کی بھیڑوں سے ابتر ہوا

اس کے کمزور اور بے ہنر ہاتھ سے چھین لی چرخ نے برتری یا نبی

کام ہم نے رکھا صرف اذکار سے تیری تعلیم اپنائی اغیار نے

حشر میں منہ دکھائیں گے کیسے تجھے ہم سے ناکردہ کار امتی یا نبی

روح ویران ہے آنکھ حیران ہے ایک بحران تھا ایک بحران ہے

گلشنوں شہروں قریوں پہ ہے پرفشاں ایک گمبھیر افسردگی یا نبی

سچ مرے دور میں جرم ہے عیب ہے جھوٹ فن عظیم آج لا ریب ہے

ایک اعزاز ہے جہل و بے رہ روی ایک آزار ہے آگہی یا نبی

راز داں اس جہاں میں بناؤں کسے روح کے زخم جا کر دکھاؤں کسے

غیر کے سامنے کیوں تماشا بنوں کیوں کروں دوستوں کو دکھی یا نبی

زیست کے تپتے صحرا پہ شاہ عرب تیرے اکرام کا ابر برسے گا کب

کب ہری ہوگی شاخ تمنا مری کب مٹے گی مری تشنگی یا نبی

یا نبی اب تو آشوب حالات نے تیری یادوں کے چہرے بھی دھندلا دئے

دیکھ لے تیرے تائبؔ کی نغمہ گری بنتی جاتی ہے نوحہ گری یا نبی

de tabassum ki khairat mahaul ko ham ko darkar hai raushni ya nabi

ek shirin jhalak ek rangin dlak talkh-o-tarik hai zindagi ya nabi

ai nawed-e-masiha tiri qaum ka hal isa ki bhiron se abtar hua

us ke kamzor aur be hunar hath se chhin li charkh ne bartari ya nabi

kam ham ne rakha sirf azkar se teri taalim apnai aghyar ne

hashr mein munh dikhaenge kaise tujhe ham se nakarda kar umati ya nabi

ruh wiran hai ankh hairan hai ek bohran tha ek bohran hai

gulshanon shahron quriyon pe hai purfishan ek gumbhir afsurdagi ya nabi

sach mire daur mein jurm hai aib hai jhut fan azim aj la raib hai

ek ezaz hai jahl-o-be rah rawi ek azar hai agahi ya nabi

raz dan is jahan mein banaun kise ruh ke zakhm ja kar dikhaun kise

ghair ke samne kyun tamasha banun kyun karun doston ko dukhi ya nabi

zist ke tapte sahra pe shah arab tere ikram ka abr barsega kab

kab hari hogi shakh-e-tamanna miri kab mitegi miri tishnagi ya nabi

ya nabi ab to ashob-e-halat ne teri yadon ke chehre bhi dhundla diye

dekh le tere taib ki naghma giri banti jati hai nauha giri ya nabi