لفظ سے جب نہ اٹھا بار خیال

لفظ سے جب نہ اٹھا بار خیال

کیسے کیسے کیا اظہار خیال

دل میں جب درد کی قندیل جلی

تمتمانے لگے رخسار خیال

روح کے زخم نہ مرجھائیں کبھی

تا ابد مہکے چمن زار خیال

غم پہ موقوف ہے تاثیر بیاں

غم سے ہے رونق‌ بازار خیال

راکب‌ فہم ہے بے بس تائبؔ

اور منہ زور ہے رہوار خیال

lafz se jab na utha bar-e-khayal

kaise kaise kiya izhar-e-khayal

dil mein jab dard ki qindil jali

tamtamane lage rukhsar-e-khayal

ruh ke zakhm na murjhaen kabhi

ta abad mahke chaman zar-e-khayal

gham pe mauquf hai tasir bayan

gham se hai raunaq-e-bazar-e-khayal

rakib-e-fahm hai be bas taib

aur munh zor hai rahwar-e-khayal