الفاظ بے صدا کا امکان آئنے میں

الفاظ بے صدا کا امکان آئنے میں

دیکھا ہے میں نے اکثر بے جان آئنے میں

کمرے میں رقص کرتی چلتی ہیں جب ہوائیں

کچھ عکس بولتے ہیں ہر آن آئنے میں

ہوگا کسی کا چہرہ پہچان کی لگن میں

ہوں گی کسی کی آنکھیں حیران آئنے میں

تہذیب کا تسلط ہے آئنے سے باہر

تاریخ کے سفر کا وجدان آئنے میں

رنگوں کی بارشوں سے دھندلا گیا ہے منظر

آیا ہوا ہے کوئی طوفان آئنے میں

زندہ حقیقتوں کی ہوتی ہے پردہ پوشی

پلتی ہے جب رعونت نادان آئنے میں

ہو روشنی کہ ظلمت صحرا ہو یا سمندر

ہوتا ہے زندگی کا عرفانؔ آئنے میں

alfaz be sada ka imkan aine mein

dekha hai main ne aksar be jan aine mein

kamre mein raqs karti chalti hain jab hawaen

kuchh aks bolte hain har an aine mein

hoga kisi ka chehra pahchan ki lagan mein

hongi kisi ki ankhen hairan aine mein

tahzib ka tasallut hai aine se bahar

tarikh ke safar ka wijdan aine mein

rangon ki barishon se dhundla gaya hai manzar

aya hua hai koi tufan aine mein

zinda haqiqaton ki hoti hai parda poshi

palti hai jab raunat nadan aine mein

ho raushni ke zulmat sahra ho ya samundar

hota hai zindagi ka irfan aine mein