عجب ہوا کہ پرندے اڑان بھول گئے

عجب ہوا کہ پرندے اڑان بھول گئے

زمیں پہ رہنے لگے آسمان بھول گئے

ضرورتوں نے کچھ ایسا بنا دیا پاگل

ہم اپنا نام و نسب خاندان بھول گئے

جب اس نے چاند ہتھیلی سے چھو دیا مجھ کو

سفر کی جو بھی تھی ساری تکان بھول گئے

عجب ہوا کہ عدالت میں کل خلاف اس کے

بیان دینے گئے تھے بیان بھول گئے

زبان یار سمجھنے کی دھن میں اے قیصرؔ

جو اپنے پاس تھی وہ بھی زبان بھول گئے

ajab hua ke parinde uran bhul gae

zamin pe rahne lage asman bhul gae

zaruraton ne kuchh aisa bana diya pagal

ham apna nam-o-nasab khandan bhul gae

jab us ne chand hatheli se chhu diya mujh ko

safar ki jo bhi thi sari takan bhul gae

ajab hua ke adalat mein kal khilaf us ke

bayan dene gae the bayan bhul gae

zaban-e-yar samajhne ki dhun mein ai qaisar

jo apne pas thi wo bhi zaban bhul gae