یاد جو آئے خود شرمائیں اف ری جوانی ہائے زمانے

یاد جو آئے خود شرمائیں اف ری جوانی ہائے زمانے

جیٹھ میں بیٹھے ساون گائیں اف ری جوانی ہائے زمانے

ہنستے ہنستے روٹھ بھی جائیں اف ری جوانی ہائے زمانے

سونا چاندی دونوں کٹائیں اف ری جوانی ہائے زمانے

دور جنوں میں یاس کا عالم حشر سے پہلے حشر کا منظر

تپتا موسم سرد ہوائیں اف ری جوانی ہائے زمانے

دن کا چکر رات کے پھیرے پاؤں دبا کر راہ کا چلنا

چور کی صورت خود گھبرائیں اف ری جوانی ہائے زمانے

گیت سریلا تان انوکھی نشہ کا عالم کیف سراپا

جیسے کنھیا بنسی بجائیں اف ری جوانی ہائے زمانے

کس کا ڈر اور کس کا کھٹکا ایک ہی ساحل ایک ہی رستہ

سپنوں کی ناؤ کھیتے جائیں اف ری جوانی ہائے زمانے

آہ حبیبؔ اس دور کی باتیں خواب کی لذت یاس کا عالم

کرتی تھیں اشارے جب لیلائیں اف ری جوانی ہائے زمانے

yad jo ae khud sharmaen uf ri jawani hae zamane

jeth mein baithe sawan gaen uf ri jawani hae zamane

hanste hanste ruth bhi jaen uf ri jawani hae zamane

sona chandi donon kataen uf ri jawani hae zamane

daur-e-junun mein yas ka alam hashr se pahle hashr ka manzar

tapta mausam sard hawaen uf ri jawani hae zamane

din ka chakkar rat ke phere paon daba kar rah ka chalna

chur ki surat khud ghabraen uf ri jawani hae zamane

git surila tan anokhi nasha ka alam kaif sarapa

jaise kunhayya bansi bajaen uf ri jawani hae zamane

kis ka dar aur kis ka khatka ek hi sahil ek hi rasta

sapnon ki nao khite jaen uf ri jawani hae zamane

ah habib is daur ki baten khwab ki lazzat yas ka alam

karti thin ishare jab lilaen uf ri jawani hae zamane