کچھ غم زیست کے آلام ابھی باقی ہیں

کچھ غم زیست کے آلام ابھی باقی ہیں

زندگی تیرے لئے کام ابھی باقی ہیں

جن سے وابستہ ہے شہرت ترے مے خانے کی

ایسے ٹوٹے ہوئے کچھ جام ابھی باقی ہیں

شب کی تاریکی نے دنیا کی بہاریں لوٹیں

آشنائے سحر و شام ابھی باقی ہیں

ہم نے صیاد کو گلشن سے نکالا ہے مگر

چار سو پھیلے ہوئے دام ابھی باقی ہیں

خار گلشن سے نکالے گئے لیکن وہ گل

جن سے گلشن ہوا بدنام ابھی باقی ہیں

کب ادھر اٹھے گی تو اے نگہ شوق بتا

کتنے پیغام ترے نام ابھی باقی ہیں

رک گیا آ کے کہاں راہ طلب میں انجمؔ

پئے منزل ترے دو گام ابھی باقی ہیں

kuchh gham-e-zist ke alam abhi baqi hain

zindagi tere liye kam abhi baqi hain

jin se wabasta hai shohrat tire mai khane ki

aise tute hue kuchh jam abhi baqi hain

shab ki tariki ne duniya ki baharen lauten

ashna-e-sahar-o-sham abhi baqi hain

ham ne sayyad ko gulshan se nikala hai magar

char su phaile hue dam abhi baqi hain

khar-e-gulshan se nikale gae lekin wo gul

jin se gulshan hua badnam abhi baqi hain

kab idhar uthegi to ai nigah-e-shauq bata

kitne paigham tire nam abhi baqi hain

ruk gaya a ke kahan rah-e-talab mein anjum

piye manzil tire do gam abhi baqi hain