معمولی بے کار سمجھنے والے مجھ سے دور رہیں

معمولی بے کار سمجھنے والے مجھ سے دور رہیں

مجھ کو اک آزار سمجھنے والے مجھ سے دور رہیں

پاگل پن میں آ کر پاگل کچھ بھی تو کر سکتا ہے

خود کو عزت دار سمجھنے والے مجھ سے دور رہیں

ہنس پڑتا ہوں جب کوئی حالات کا رونا روتا ہے

جیون کو دشوار سمجھنے والے مجھ سے دور رہیں

میں واقف ہوں رنگوں کی ہر رنگ بدلتی فطرت سے

رونق کو بازار سمجھنے والے مجھ سے دور رہیں

مجنوں اور شاہوں میں کچھ دن میں بھی اٹھا بیٹھا ہوں

صحرا کو گل زار سمجھنے والے مجھ سے دور رہیں

منزل کی خواہش ہے جن کو آئیں میرے ساتھ چلیں

رستوں کو ہموار سمجھنے والے مجھ سے دور رہیں

آنچل اور ملبوس پہ جن کی آنکھیں چپکی رہتی ہیں

ان کو با کردار سمجھنے والے مجھ سے دور رہیں

فیض عالم بابرؔ خود بھی یار ہے جانے کس کس کا

یاروں کو مکار سمجھنے والے مجھ سے دور رہیں

maamuli be kar samajhne wale mujh se dur rahen

mujh ko ik azar samajhne wale mujh se dur rahen

pagal pan mein a kar pagal kuchh bhi to kar sakta hai

khud ko izzat dar samajhne wale mujh se dur rahen

hans parta hun jab koi halat ka rona rota hai

jiwan ko dushwar samajhne wale mujh se dur rahen

main waqif hun rangon ki har rang badalti fitrat se

raunaq ko bazar samajhne wale mujh se dur rahen

majnun aur shahon mein kuchh din mein bhi utha baitha hun

sahra ko gul zar samajhne wale mujh se dur rahen

manzil ki khwahish hai jin ko aen mere sath chalen

raston ko hamwar samajhne wale mujh se dur rahen

anchal aur malbus pe jin ki ankhen chipki rahti hain

un ko ba kirdar samajhne wale mujh se dur rahen

faiz alam babar khud bhi yar hai jane kis kis ka

yaron ko makkar samajhne wale mujh se dur rahen