زمیں نہیں تھی زمیں پر کوئی مکاں نہیں تھا

زمیں نہیں تھی زمیں پر کوئی مکاں نہیں تھا

میں ان دنوں بھی کہیں تھا جب آسماں نہیں تھا

کچھ اس لئے بھی مسافر بھٹک نہیں پائے

کہ ان کے ساتھ کوئی میر کارواں نہیں تھا

عجیب شور تھا جو اٹھ رہا تھا سینے سے

عجیب آگ تھی جس کا کوئی دھواں نہیں تھا

میں چاہتا ہوں جسے وہ بھی چاہتا ہے مجھے

یقیں کرو مجھے اس بات کا گماں نہیں تھا

وہ کوئی اور تھا جو تم سے بات کر رہا تھا

وہ لفظ میرے تھے لیکن مرا بیاں نہیں تھا

وگرنہ مجھ کو بھی کچھوے سے مات ہو جاتی

ہزار شکر کہ رستے میں سائباں نہیں تھا

بچھڑتے وقت جو واپس بلا رہا تھا مجھے

وہ میرے لوٹ کے آنے پہ شادماں نہیں تھا

zamin nahin thi zamin par koi makan nahin tha

main in dinon bhi kahin tha jab asman nahin tha

kuchh is liye bhi musafir bhatak nahin pae

ke un ke sath koi mir-e-karwan nahin tha

ajib shor tha jo uth raha tha sine se

ajib ag thi jis ka koi dhuan nahin tha

main chahta hun jise wo bhi chahta hai mujhe

yaqin karo mujhe is bat ka guman nahin tha

wo koi aur tha jo tum se bat kar raha tha

wo lafz mere the lekin mira bayan nahin tha

wagarna mujh ko bhi kachhwe se mat ho jati

hazar shukr ke raste mein saiban nahin tha

bichharte waqt jo wapas bala raha tha mujhe

wo mere laut ke ane pe shadman nahin tha