جانے ایسی ٹھان کر بیٹھا ہے کیا میرے لئے

جانے ایسی ٹھان کر بیٹھا ہے کیا میرے لئے

آج مانگے جا رہا ہے وہ دعا میرے لئے

مضطرب دل کو مرے آرام آ ہی جائے گا

کیجئے تجویز کوئی تو دوا میرے لئے

میری قسمت میں تو لکھے ہیں غموں کے سلسلے

خوش رہا کر تو نہ اپنا دل دکھا میرے لئے

حسن کی تابانیوں کو میں بھی تو دیکھوں ذرا

تو رخ زیبا سے یہ پردہ ہٹا میرے لئے

بھول جاتا ہوں سبھی کچھ یاد رہتا کچھ نہیں

بن گیا ہے ایک یہ بھی مسئلہ میرے لئے

ہجر آنسو مے کشی رنج و الم آہ و فغاں

یا الٰہی کیا یہی کچھ رہ گیا میرے لئے

سنگ دل مشہور تھا جو شہر بھر میں دوستو

مجھ کو حیرت ہے کہ وہ بھی رو پڑا میرے لئے

یہ قیامت کے مجھے آثار لگتے ہیں میاں

چلتے چلتے وہ اچانک رک گیا میرے لئے

تنگیٔ دامن سے میں اعجازؔ گھبرایا نہیں

کھول دے گا اور دروازے خدا میرے لئے

آج ساقی دیکھ کر اعجازؔ میری تشنگی

جام و ساغر لے کے گھر میں آ گیا میرے لئے

jane aisi than kar baitha hai kya mere liye

aj mange ja raha hai wo dua mere liye

muztarib dil ko mire aram a hi jaega

kijiye tajwiz koi to dawa mere liye

meri qismat mein to likhe hain ghamon ke silsile

khush raha kar to na apna dil dikha mere liye

husn ki tabaniyon ko main bhi to dekhun zara

tu rukh-e-zeba se ye parda hata mere liye

bhul jata hun sabhi kuchh yad rahta kuchh nahin

ban gaya hai ek ye bhi masala mere liye

hijr ansu mai kashi ranj-o-alam ah-o-fughan

ya ilahi kya yahi kuchh rah gaya mere liye

sang dil mashhur tha jo shahr bhar mein dosto

mujh ko hairat hai ke wo bhi ro para mere liye

ye qayamat ke mujhe asar lagte hain miyan

chalte chalte wo achanak ruk gaya mere liye

tangi-e-daman se main ejaz ghabraya nahin

khol dega aur darwaze khuda mere liye

aj saqi dekh kar ejaz meri tishnagi

jam-o-saghar le ke ghar mein a gaya mere liye