سر کیا زلف کی شب کو تو سحر تک پہنچے

سر کیا زلف کی شب کو تو سحر تک پہنچے

ورنہ ہم لوگ کہاں حسن نظر تک پہنچے

آج پلکوں پہ مری جشن چراغاں ہوگا

کتنے انمول گہر دیدۂ تر تک پہنچے

میری راتوں کا اندھیرا بھی دعائیں دے گا

اک ستارہ جو اتر کر مرے گھر تک پہنچے

کون کہتا ہے کہ خورشید اتر کر آئے

ایک جگنو ہی مگر خاک بسر تک پہنچے

جو بھی آئے ترے کوچے میں وہ جاں سے گزرے

سر ہتھیلی پہ اٹھائے ترے در تک پہنچے

ہے اسی صاحب معراج کا احسان کہ ہم

خاک ہو کر بھی مگر شمس و قمر تک پہنچے

میں اندھیروں کا مسافر ہوں اجالوں کا نقیب

کس کی جرأت ہے مری گرد سفر تک پہنچے

انگلیاں پہلے قلم کرنا پڑیں گی بابرؔ

پھر یہ ممکن ہے قلم حرف ہنر تک پہنچے

sar kiya zulf ki shab ko to sahar tak pahunche

warna ham log kahan husn-e-nazar tak pahunche

aj palkon pe miri jashn-e-charaghan hoga

kitne anmol guhar dida-e-tar tak pahunche

meri raton ka andhera bhi duaen dega

ik sitara jo utar kar mire ghar tak pahunche

kaun kahta hai ke khurshid utar kar ae

ek jugnu hi magar khak basar tak pahunche

jo bhi ae tire kuche mein wo jan se guzre

sar hatheli pe uthae tire dar tak pahunche

hai isi sahab-e-meraj ka ehsan ke ham

khak ho kar bhi magar shams-o-qamar tak pahunche

main andheron ka musafir hun ujalon ka naqib

kis ki jurat hai miri gard-e-safar tak pahunche

ungliyan pahle qalam karna parengi babar

phir ye mumkin hai qalam harf-e-hunar tak pahunche