چمکتے سورج اچھالتے تھے کہاں گئے وہ

چمکتے سورج اچھالتے تھے کہاں گئے وہ

جو شامیں صبحوں میں ڈھالتے تھے کہاں گئے وہ

بدن میں لرزش کہ دن ڈھلا جا رہا ہے پھر سے

جو دن سے گردش نکالتے تھے کہاں گئے وہ

ابھی تو ہاتھوں میں حدتیں ان کے ہاتھ کی ہیں

ابھی تو ہم کو سنبھالتے تھے کہاں گئے وہ

اتارتے تھے غبار لیل و نہار رخ سے

اور آئنوں کو اجالتے تھے کہاں گئے وہ

وہ شاخچے چھو کے سبز کرنے کے فن سے واقف

جو پھول ہاتھوں میں پالتے تھے کہاں گئے وہ

جو اسم پڑھتے تھے روشنی کا سیہ شبوں میں

جو لو چراغوں میں ڈالتے تھے کہاں گئے وہ

chamakte suraj uchhalte the kahan gae wo

jo shamen subhon mein dhalte the kahan gae wo

badan mein larzish ke din dhala ja raha hai phir se

jo din se gardish nikalte the kahan gae wo

abhi to hathon mein hiddaten un ke hath ki hain

abhi to ham ko sambhalte the kahan gae wo

utarte the ghubar lail-o-nahar rukh se

aur ainon ko ujalte the kahan gae wo

wo shakhche chhu ke sabz karne ke fan se waqif

jo phul hathon mein palte the kahan gae wo

jo ism parhte the raushni ka siyah shabon mein

jo lo charaghon mein dalte the kahan gae wo