یاس کی کہر میں لپٹا ہوا چہرہ دیکھا

یاس کی کہر میں لپٹا ہوا چہرہ دیکھا

جسم کا ایک بگڑتا ہوا خاکہ دیکھا

اپنی صورت بھی نہ پہچان سکی آنکھ مری

مدتوں بعد جو میں نے کبھی شیشہ دیکھا

شہر پر ہول میں اب کے یہ عجب منظر تھا

سنگ کشادہ تھا مگر سنگ کو بستہ دیکھا

میں بھی گم صم تھا کوئی بات نہ کرنے پایا

اس کے ہونٹوں پہ بھی جیسے کوئی پہرا دیکھا

تیرا قرب ایک تمنا سو تمنا ہی رہی

حاصل عمر یہی ہے ترا رستہ دیکھا

کیا عجب راکھ سے پیدا ہو کوئی قصر عظیم

ہم نے آتش میں بھی گل زار کا نقشہ دیکھا

میں ہی غمگین نہیں ترک تعلق پہ کمالؔ

وہ بھی ناشاد تھا اس کو بھی فسردہ دیکھا

yas ki kohr mein lipta hua chehra dekha

jism ka ek bigarta hua khaka dekha

apni surat bhi na pahchan saki ankh miri

muddaton baad jo main ne kabhi shisha dekha

shahr pur haul mein ab ke ye ajab manzar tha

sang kushada tha magar sang ko basta dekha

main bhi gum sum tha koi bat na karne paya

us ke honton pe bhi jaise koi pahra dekha

tera qurb ek tamanna so tamanna hi rahi

hasil-e-umr yahi hai tira rasta dekha

kya ajab rakh se paida ho koi qasr-e-azim

ham ne atish mein bhi gul zar ka naqsha dekha

main hi ghamgin nahin tark-e-taalluq pe kamal

wo bhi nashad tha us ko bhi fasurda dekha