ہو گئے آنگن جدا اور راستے بھی بٹ گئے

ہو گئے آنگن جدا اور راستے بھی بٹ گئے

کیا ہوا یہ لوگ کیوں اک دوسرے سے کٹ گئے

غم نے ہر اک راستے میں کھول رکھا تھا محاذ

ہم بھی چہرے پر ہنسی کا خول لے کر ڈٹ گئے

نفرتوں کی دھوپ جھلسانے لگی ہر شخص کو

پیار کے اس شہر میں سب پیڑ کیسے کٹ گئے

ڈر کی جب ساری حقیقت منکشف ہم پر ہوئی

خود بخود ڈر کے سبھی سائے اچانک ہٹ گئے

کون جانے کس نشیمن پر گری ہیں بجلیاں

کس طرف ٹوٹے ہوئے تاروں کے یہ جھرمٹ گئے

معتبر ہونے لگیں جب بزم میں تاریکیاں

خامشی کی اوٹ میں ہم لوگ پیچھے ہٹ گئے

گھر سے اے انجمؔ ذرا باہر نکل کر دیکھنا

لوگ کہتے ہیں کہ اب تاریک بادل چھٹ گئے

ho gae angan juda aur raste bhi bat gae

kya hua ye log kyun ik dusre se kat gae

gham ne har ik raste mein khol rakha tha mahaz

ham bhi chehre par hansi ka khol le kar dat gae

nafraton ki dhup jhulsane lagi har shakhs ko

pyar ke is shahr mein sab per kaise kat gae

dar ki jab sari haqiqat munkashif ham par hui

khud bakhud dar ke sabhi sae achanak hat gae

kaun jane kis nasheman par giri hain bijliyan

kis taraf tute hue taron ke ye jhurmut gae

motabar hone lagen jab bazm mein tarikiyan

khamushi ki ot mein ham log pichhe hat gae

ghar se ai anjum zara bahar nikal kar dekhna

log kahte hain ke ab tarik badal chhut gae