لہو لہو آرزو بدن کا لحاف ہوگا

لہو لہو آرزو بدن کا لحاف ہوگا

وہ کتنا بزدل ہے آج یہ انکشاف ہوگا

مری ہر اک بات تھی حقائق کی روشنی میں

یہ جانتا تھا زمانہ میرے خلاف ہوگا

حقیقتوں کے چراغ ہر سو جلا کے رکھنا

مجھے یقیں ہے کہ جھوٹ کا انعطاف ہوگا

یہ غم نہیں ہے شناخت اپنی میں کھو چکا ہوں

تمہاری ہستی سے کب مجھے انحراف ہوگا

نہ کھوج خود کو پرانے کل کی کہانیوں میں

پرانا کل تو شکست کا اعتراف ہوگا

ہماری باتوں میں کوئی پیچیدگی نہیں ہے

ہماری باتوں سے کب اسے اختلاف ہوگا

رموز عالم پہ دسترس اس کو ہوگی حاصل

وہ شخص کردار جس کا شفاف و صاف ہوگا

سزا کے ڈر سے عبث تو گھبرا رہا ہے انجمؔ

قصور پہلا تو ہر کسی کو معاف ہوگا

lahu lahu arzu badan ka lihaf hoga

wo kitna buzdil hai aj ye inkishaf hoga

miri har ik bat thi haqaiq ki raushni mein

ye janta tha zamana mere khilaf hoga

haqiqaton ke charagh har su jala ke rakhna

mujhe yaqin hai ke jhut ka initaf hoga

ye gham nahin hai shanakht apni mein kho chuka hun

tumhari hasti se kab mujhe inhiraf hoga

na khoj khud ko purane kal ki kahaniyon mein

purana kal to shikast ka etiraf hoga

hamari baton mein koi pechidgi nahin hai

hamari baton se kab use ikhtilaf hoga

rumuz-e-alam pe dastaras us ko hogi hasil

wo shakhs kirdar jis ka shaffaf-o-saf hoga

saza ke dar se abas to ghabra raha hai anjum

qusur pahla to har kisi ko muaf hoga