نئے زمانے کے نت نئے حادثات لکھنا

نئے زمانے کے نت نئے حادثات لکھنا

اداس پھولوں کی زرد پتوں کی بات لکھنا

فلک دریچوں سے جھانکتے خوش نما مناظر

زمیں پہ بے زاریوں میں لپٹی حیات لکھنا

تھکن کا احساس ہو تو کر لینا یاد اس کو

ادھورے خوابوں کی سر پھری کائنات لکھنا

سیاہی کس نے بکھیر دی کورے کاغذوں پر

کہ اجلے الفاظ کھا گئے کیسے مات لکھنا

یہ کون اس کی کہانیاں پھر سنا رہا ہے

کہاں سے آئی ہے خوشبوؤں کی برات لکھنا

اندھیرے رستے میں روشنی کی صدا سے پہلے

یہ کس نے کاندھے پہ رکھ دیا اپنا ہات لکھنا

اجالے فردا کے ڈھونڈھتی ہیں تھکی نگاہیں

یہ کن حصاروں میں قید ہے اپنی ذات لکھنا

بھٹک گئی ہے چہار سمتوں میں سوچ کیوں کر

کہ ذہن و دل پر لگا گیا کون گھات لکھنا

کلام تیرا فسردہ چہروں کا آئنہ ہو

تو اپنے اشعار میں ہر اک دل کی بات لکھنا

اسے یہ ضد تھی کہ دن کو لکھوں میں رات انجمؔ

مجھے نہ منظور تھا کبھی دن کو رات لکھنا

nae zamane ke nit nae hadsat likhna

udas phulon ki zard patton ki bat likhna

falak darichon se jhankte khush numa manazir

zamin pe be zariyon mein lipti hayat likhna

thakan ka ehsas ho to kar lena yad us ko

adhure khwabon ki sar phiri kainat likhna

siyahi kis ne bikher di kore kaghazon par

ke ujle alfaz kha gae kaise mat likhna

ye kaun us ki kahaniyan phir suna raha hai

kahan se ai hai khushbuon ki barat likhna

andhere raste mein raushni ki sada se pahle

ye kis ne kandhe pe rakh diya apna hat likhna

ujale farda ke dhundhti hain thaki nigahen

ye kin hisaron mein qaid hai apni zat likhna

bhatak gai hai chahar samton mein soch kyun kar

ke zehn-o-dil par laga gaya kaun ghat likhna

kalam tera fasurda chehron ka aina ho

tu apne ashar mein har ik dil ki bat likhna

use ye zid thi ke din ko lakhon mein rat anjum

mujhe na manzur tha kabhi din ko rat likhna