یہ کیسے نمو کے سلسلے ہیں

یہ کیسے نمو کے سلسلے ہیں

شاخوں پہ گلاب جل بجھے ہیں

پھیلی ہے ستم کی آگ ہرسو

ہر سمت الاؤ جل رہے ہیں

ہر آنکھ سوال کر رہی ہے

ہر دل میں ہزار وسوسے ہیں

برسی ہیں بلائیں آسماں سے

دھرتی پہ عذاب اگ رہے ہیں

محفوظ نہیں پناہ گاہیں

کیا عقل رسا کے معجزے ہیں

بازار لہو کی وحشتوں کے

تہذیب کے نام پر سجے ہیں

غیروں پہ ہے انحصار اپنا

سوچیں بھی ادھار مانگتے ہیں

سورج بھی ہے دسترس میں لیکن

ہم روشنی کو ترس گئے ہیں

کیا جانیے عہد نو کب آئے

اب تک تو پرانے سلسلے ہیں

ye kaise numu ke silsile hain

shakhon pe gulab jal bujhe hain

phaili hai sitam ki ag harso

har samt alao jal rahe hain

har ankh sawal kar rahi hai

har dil mein hazar waswase hain

barsi hain balaen asman se

dharti pe azab ug rahe hain

mahfuz nahin panah gahen

kya aql rasa ke mojize hain

bazar lahu ki wahshaton ke

tahzib ke nam par saje hain

ghairon pe hai inhisar apna

sochen bhi udhar mangte hain

suraj bhi hai dastaras mein lekin

ham raushni ko taras gae hain

kya janiye ahd-e-nau kab ae

ab tak to purane silsile hain