ہاتھ میں ہے اک پرانی ڈائری

ہاتھ میں ہے اک پرانی ڈائری

کھولنے بیٹھا ہوں گرہیں یاد کی

اس سے وعدہ ہے ملیں گے شام کو

شام کتنی دیر کے بعد آئے گی

ہم نے سوچا تھا چلیں گے سیر کو

راستوں نے پھر سفیدی اوڑھ لی

گرم کمروں سے نکلتا کون ہے

محفلیں اجڑی ہوئی ہیں شہر کی

چبھ رہی ہے میری آنکھوں میں بہت

چار سو پھیلی ہوئی بے منظری

پیار کی خوشبو سے خالی نسبتیں

رابطے سب دل کے رنگوں سے تہی

اک تعلق بنتے بنتے رہ گیا

کھلتے کھلتے اک کلی مرجھا گئی

hath mein hai ik purani dairi

kholne baitha hun girhen yad ki

us se waada hai milenge sham ko

sham kitni der ke baad aegi

ham ne socha tha chalenge sair ko

raston ne phir safedi orh li

garm kamron se nikalta kaun hai

mahfilen ujri hui hain shahr ki

chubh rahi hai meri ankhon mein bahut

char su phaili hui be manzari

pyar ki khushbu se khali nisbaten

rabte sab dil ke rangon se tahi

ik taalluq bante bante rah gaya

khulte khulte ik kali murjha gai