زندہ رہنے کی طلب اس لیے پیاری نہ رہی

زندہ رہنے کی طلب اس لیے پیاری نہ رہی

کوئی وقعت دل قاتل میں ہماری نہ رہی

مے کشی چھوڑ دی اس واسطے ہم نے ساقی

پہلے جیسی تری آنکھوں میں خماری نہ رہی

نیند کا زہر نگاہوں میں سمایا جب سے

رتجگوں سے مری با ضابطہ یاری نہ رہی

آخرش آ ہی گیا کشتۂ حسرت کو قرار

عمر بھر لذت آوارگی طاری نہ رہی

سیکھتا کس طرح آئین جنوں کے آداب

مجھ پہ مائل بہ کرم دید تمہاری نہ رہی

شدت ضبط سے پتھرا گئیں آنکھیں بھی ندیمؔ

غم رہا ساتھ میں پر گریہ و زاری نہ رہی

zinda rahne ki talab is liye pyari na rahi

koi waqat dil-e-qatil mein hamari na rahi

mai kashi chhor di is waste ham ne saqi

pahle jaisi tiri ankhon mein khumari na rahi

nind ka zahr nigahon mein samaya jab se

ratjagon se miri ba zabta yari na rahi

akhirash a hi gaya kushta-e-hasrat ko qarar

umr bhar lazzat-e-awargi tari na rahi

sikhta kis tarah ain-e-junun ke adab

mujh pe mail ba karam did tumhari na rahi

shiddat-e-zabt se pathra gain ankhen bhi nadim

gham raha sath mein par girya-o-zari na rahi