جب بڑھا درد کی موجوں کا دباؤ صاحب

جب بڑھا درد کی موجوں کا دباؤ صاحب

میری سانسوں کی لرزنے لگی ناؤ صاحب

اس سے بڑھ کر نہیں افسردہ مزاجی کا علاج

دل اگر روئے تو اوروں کو ہنساؤ صاحب

گھپ اندھیرے میں اگاتا ہوں سخن کا سورج

بے سبب تھوڑی ہے راتوں سے لگاؤ صاحب

جب نہیں ملتی نئے زخم کی سوغات مجھے

چھیل دیتا ہوں پرانا کوئی گھاؤ صاحب

جس کی دانائی نے منسوخ کئے ہوش و حواس

ایسے نادان پہ پتھر نہ اٹھاؤ صاحب

میں نے اس حسن مجسم کی زیارت کی ہے

میری آنکھوں کے ذرا دام لگاؤ صاحب

بجلیاں وصل کی سانسوں پہ گراؤ صاحب

رخ سے بھیگی ہوئی زلفوں کو ہٹاؤ صاحب

جیسے صحراؤں میں ملتے ہیں دو پیاسے دریا

ہونٹ سے ہونٹ کچھ اس طرح ملاؤ صاحب

دل محبت کی ثقافت کا ازل سے ہے امیں

اس شہنشاہ کو نفرت نہ سکھاؤ صاحب

جیت کر جشن منانا تو ہوئی عام سی بات

ہار کر بھی تو کبھی جشن مناؤ صاحب

ہم نئے عہد کے سقراط ہیں اس بار ہمیں

زہر کا پیالہ نہیں جام پلاؤ صاحب

jab barha dard ki maujon ka dabao sahab

meri sanson ki larazne lagi nao sahab

is se barh kar nahin afsurda mizaji ka ilaj

dil agar roe to auron ko hansao sahab

ghap andhere mein ugata hun sukhan ka suraj

be sabab thori hai raton se lagao sahab

jab nahin milti nae zakhm ki saughat mujhe

chhail deta hun purana koi ghao sahab

jis ki danai ne mansukh kiye hosh-o-hawas

aise nadan pe patthar na uthao sahab

main ne us husn mujassam ki ziyarat ki hai

meri ankhon ke zara dam lagao sahab

bijliyan wasl ki sanson pe girao sahab

rukh se bhigi hui zulfon ko hatao sahab

jaise sahraon mein milte hain do pyase dariya

hont se hont kuchh is tarah milao sahab

dil mohabbat ki saqafat ka azal se hai amin

is shahanshah ko nafrat na sikhao sahab

jit kar jashn manana to hui am si bat

har kar bhi to kabhi jashn manao sahab

ham nae ahd ke suqrat hain is bar hamen

zahr ka pyala nahin jam pilao sahab