شعور عشق ملے روئے دار رقص کروں

شعور عشق ملے روئے دار رقص کروں

ہیں میرے پاس بہانے ہزار رقص کروں

گلوئے خشک کی شہ رگ تھک کے کہتی ہے

کچھ اور تیز ہو خنجر کی دھار رقص کروں

طواف خانۂ دل دار گر نصیب نہیں

خود اپنے دل کا بنا کر مزار رقص کروں

برہنہ جسم ہے کہنہ لباس پھٹ گیا ہے

سو اوڑھ کر میں ردائے غبار رقص کروں

اجاڑ دشت میں مقتل یہ بار بار سجے

لہو میں ڈوب کے میں بار بار رقص کروں

انی کچھ اور چبھا اے ستم شعار کہ میں

تڑپ کے درد میں بے بند و بار رقص کروں

دعا ہے میری میں زخموں کی تاب لا نہ سکوں

شراب موت کا جاگے خمار رقص کروں

سنا چکا سر نیزہ میں ایک تازہ غزل

ندیمؔ ہے مجھے اب اختیار رقص کروں

shuur-e-ishq mile roe dar raqs karun

hain mere pas bahane hazar raqs karun

galo-e-khushk ki shah rag-e-thak ke kahti hai

kuchh aur tez ho khanjar ki dhar raqs karun

tawaf-e-khana-e-dil dar gar nasib nahin

khud apne dil ka bana kar mazar raqs karun

barahna jism hai kohna libas phat gaya hai

so orh kar main rida-e-ghubar raqs karun

ujar dasht mein maqtal ye bar bar saje

lahu mein dub ke main bar bar raqs karun

ani kuchh aur chubha ai sitam shiar ke main

tarap ke dard mein be band-o-bar raqs karun

dua hai meri mein zakhmon ki tab la na sakun

sharab maut ka jage khumar raqs karun

suna chuka sar neza mein ek taza ghazal

nadim hai mujhe ab ikhtiyar raqs karun