عرصۂ خواب سے اٹھ حلقۂ تعبیر میں آ

عرصۂ خواب سے اٹھ حلقۂ تعبیر میں آ

گمشدہ رعب جنوں کاسۂ تشہیر میں آ

انتہا مبدائے ہستی کی فنا ہے یا بقا

غور سے دیکھتے ہیں بخت کی تصویر میں آ

اے خرابات تنفر کے پریشان مکیں

گر سکوں چاہتا ہے عشق کی تعمیر میں آ

حدت دید نگاہوں کی عبارت سے نکل

اور یخ بستہ مرے روزن تحریر میں آ

چڑھ کے پھر سر پہ مرے بولے اسیری کا خمار

قید کر لے مجھے پھر زلف کی زنجیر میں آ

عہد ماضی کے خوش آئند بھٹکتے لمحے

وقت آ پہنچا ہے اب حال کی جاگیر میں آ

جل بجھے گرمیٔ انفاس سے دونوں کا وجود

گھولنے خود کو مرے قرب کی تاثیر میں آ

لذت وصل کو حاصل ہو زمیں کی جنت

مجھ سے ملنے کے لئے وادئ کشمیر میں آ

زیر پا رکھ کے سبھی عکس فسون تقدیر

پھر جواں ہونے کو گہوارۂ تدبیر میں آ

اے خزاں زاد اگر چاہتا ہے رزق بہار

دامن زیست لئے روضۂ شبیر میں آ

عاجزی کہنے لگی گر ہو بلندی کی طلب

دل جھکا دائرۂ نعرۂ تکبیر میں آ

دیا اگتے ہوئے سورج نے یہ پیغام ندیمؔ

ان اندھیروں سے نکل خیمۂ تنویر میں آ

arsa-e-khwab se uth halqa-e-taabir mein a

gumshuda rob-e-junun kasa-e-tashhir mein a

intiha mubda-e-hasti ki fana hai ya baqa

ghaur se dekhte hain bakht ki taswir mein a

ai kharabat tanaffur ke pareshan makin

gar sakun chahta hai ishq ki taamir mein a

hiddat-e-did nigahon ki ibarat se nikal

aur yakh basta mire rauzan-e-tahrir mein a

charh ke phir sar pe mire bole asiri ka khumar

qaid kar le mujhe phir zulf ki zanjir mein a

ahd-e-mazi ke khush aind bhatakte lamhe

waqt a pahuncha hai ab hal ki jagir mein a

jal bujhe garmi-e-anfas se donon ka wajud

gholne khud ko mire qurb ki tasir mein a

lazzat-e-wasl ko hasil ho zamin ki jannat

mujh se milne ke liye wadi-e-kashmir mein a

zer-e-pa rakh ke sabhi aks fusun-e-taqdir

phir jawan hone ko gahwara-e-tadbir mein a

ai khizan zad agar chahta hai rizq-e-bahar

daman-e-zist liye rauza-e-shabbir mein a

ajizi kahne lagi gar ho bulandi ki talab

dil jhuka daira-e-naara-e-takbir mein a

diya ugte hue suraj ne ye paigham nadim

in andheron se nikal khema-e-tanwir mein a