بیاض کہنہ میں جدت بھری تحریر رکھنی ہے

بیاض کہنہ میں جدت بھری تحریر رکھنی ہے

پرانی نیام میں یعنی نئی شمشیر رکھنی ہے

فصیل فکر سے گرتا ہوا مصرع اٹھانا ہے

سرہانے اب مجھے ہر دم کتاب میرؔ رکھنی ہے

مجھے تا عمر رنج قید کو محسوس کرنا ہے

مجھے تا عمر اپنے پاس یہ زنجیر رکھنی ہے

سجاؤ خواب کوئی رات کی بے رنگ آنکھوں میں

اگر باقی دلوں میں خواہش تعبیر رکھنی ہے

خودی سے بے خودی کی جنگ ہے گویا مجھے اس پل

مقابل اپنے ہی اپنی کوئی تصویر رکھنی ہے

ہمیں اپنے لہو سے دشت اک گلزار کرنا ہے

ہمیں تا حشر زندہ عظمت تکبیر رکھنی ہے

اسے دنیا کے ہر غم سے مکمل پاک تو کر لو

اگر اس دل میں بنیاد غم شبیر رکھنی ہے

bayaz-e-kohna mein jiddat bhari tahrir rakhni hai

purani niyam mein yaani nai shamshir rakhni hai

fasil-e-fikr se girta hua misra uthana hai

sirhane ab mujhe har dam kitab-e-mir rakhni hai

mujhe ta umr ranj-e-qaid ko mahsus karna hai

mujhe ta umr apne pas ye zanjir rakhni hai

sajao khwab koi rat ki be rang ankhon mein

agar baqi dilon mein khwahish-e-taabir rakhni hai

khudi se be khudi ki jang hai goya mujhe is pal

muqabil apne hi apni koi taswir rakhni hai

hamen apne lahu se dasht ik gulzar karna hai

hamen ta hashr zinda azmat takbir rakhni hai

use duniya ke har gham se mukammal pak to kar lo

agar is dil mein buniyad-e-gham-e-shabbir rakhni hai