تم چلے آؤ تو ذوق غم ہجراں بھی نہیں

تم چلے آؤ تو ذوق غم ہجراں بھی نہیں

جان دینے کا کچھ ایسا مجھے ارماں بھی نہیں

دیکھتا ہے کہ کوئی بات کا پرساں بھی نہیں

ترے بیمار کو اب خواہش درماں بھی نہیں

مری وحشت کے اثر سے تھا زمانہ ویراں

میں بیاباں میں نہیں ہوں تو بیاباں بھی نہیں

باعث قتل ہوا حال زبون بسمل

یہ اگر سچ ہے تو پھر آپ کا احساں بھی نہیں

میرا مرنا بھی ہے موقوف ارادوں پہ ترے

جس کو آسان سمجھتا ہوں وہ آساں بھی نہیں

تیرے پیکان ستم کا ہوا مقصد حاصل

زخم دل میں ہے مرے اور نمایاں بھی نہیں

ہم نوا سوچ میں ہیں باغ ہے سونا سونا

میں قفس میں ہوں تو وہ رنگ گلستاں بھی نہیں

دل گم گشتہ سے ملنے کی تمنا ہے شمیمؔ

یہ وہ خواہش ہے کہ جس کا کوئی امکاں بھی نہیں

tum chale ao to zauq-e-gham-e-hijran bhi nahin

jan dene ka kuchh aisa mujhe arman bhi nahin

dekhta hai ke koi bat ka pursan bhi nahin

tire bimar ko ab khwahish-e-darman bhi nahin

miri wahshat ke asar se tha zamana wiran

main bayaban mein nahin hun to bayaban bhi nahin

bais-e-qatl hua hal-e-zabun-e-bismil

ye agar sach hai to phir ap ka ehsan bhi nahin

mera marna bhi hai mauquf iradon pe tire

jis ko asan samajhta hun wo asan bhi nahin

tere paikan-e-sitam ka hua maqsad hasil

zakhm-e-dil mein hai mire aur numayan bhi nahin

ham nawa soch mein hain bagh hai sona sona

main qafas mein hun to wo rang-e-gulistan bhi nahin

dil-e-gum gashta se milne ki tamanna hai shamim

ye wo khwahish hai ke jis ka koi imkan bhi nahin