غیر سے جم نہ سکا رنگ وفا میرے بعد

غیر سے جم نہ سکا رنگ وفا میرے بعد

مٹ گیا شیوۂ تسلیم و رضا میرے بعد

اس ستم گر کے اٹھے دست دعا میرے بعد

بیکسی دیکھتی ہے شان خدا میرے بعد

اب تو وہ گرمیٔ بازار حسیناں بھی نہیں

کیسی تبدیل ہوئی آب و ہوا میرے بعد

شکر ہے مر کے میں آئین وفا سے چھوٹا

رہ سکے وہ بھی نہ پابند جفا میرے بعد

شمع خاموش رہی روح بھی دب کر نکلی

کوئی ہنگامۂ عالم نہ ہوا میرے بعد

حسن اور عشق کے چرچوں میں بھی کچھ لطف نہیں

مل گیا خاک میں دنیا کا مزا میرے بعد

جان دیتے ہوئے اس واسطے ڈرتا ہوں شمیمؔ

کھل نہ جائے کہیں انجام وفا میرے بعد

ghair se jam na saka rang-e-wafa mere baad

mit gaya shewa-e-taslim-o-raza mere baad

us sitam gir ke uthe dast-e-dua mere baad

bekasi dekhti hai shan-e-khuda mere baad

ab to wo garmi-e-bazar-e-hasinan bhi nahin

kaisi tabdil hui ab-o-hawa mere baad

shukr hai mar ke main ain-e-wafa se chhota

rah sake wo bhi na paband-e-jafa mere baad

shama khamosh rahi ruh bhi dab kar nikli

koi hangama-e-alam na hua mere baad

husn aur ishq ke charchun mein bhi kuchh lutf nahin

mil gaya khak mein duniya ka maza mere baad

jan dete hue is waste darta hun shamim

khul na jae kahin anjam-e-wafa mere baad