ہمیں سفینۂ ہستی کا رہنما نہ ملا

ہمیں سفینۂ ہستی کا رہنما نہ ملا

خدا کو ساتھ لیا کوئی ناخدا نہ ملا

سکون قلب ملا بے نیازیاں پائیں

اٹھائے ہاتھ جو تیری طرف تو کیا نہ ملا

کسی کی شرکت اغیار کب گوارا تھی

خدا کا شکر کوئی درد آشنا نہ ملا

تڑپ تڑپ کے ترے بسملوں نے مقتل میں

بڑھائے ہاتھ مگر دامن قضا نہ ملا

ملی تھی آنکھ تو پھر تاب دید بھی ملتی

تجلیوں کے تماشہ میں کچھ مزا نہ ملا

تھا اضطراب میں وہ لطف زندگی مضمر

پھر اس کے بعد کسی بات میں مزا نہ ملا

تمہاری شوخیٔ تقریر کا تو کیا کہنا

جواب صاف کبھی میری بات کا نہ ملا

نگاہ شرم سے نیچی رہی پشیماں کی

وہ بے وفا جو ملا بھی تو بے وفا نہ ملا

شریک حال اب احباب تک نہیں ہوتے

شمیمؔ ہم کو بھی قسمت سے کیا زمانہ ملا

hamen safina-e-hasti ka rahnuma na mila

khuda ko sath liya koi nakhuda na mila

sukun-e-qalb mila be niyaziyan paen

uthae hath jo teri taraf to kya na mila

kisi ki shirkat aghyar kab gawara thi

khuda ka shukr koi dard-e-ashna na mila

tarap tarap ke tire bismilon ne maqtal mein

barhae hath magar daman-e-qaza na mila

mili thi ankh to phir tab did bhi milti

tajalliyon ke tamasha mein kuchh maza na mila

tha iztirab mein wo lutf-e-zindagi muzmar

phir is ke baad kisi bat mein maza na mila

tumhari shokhi-e-taqrir ka to kya kahna

jawab-e-saf kabhi meri bat ka na mila

nigah-e-sharm se nichi rahi pasheman ki

wo be wafa jo mila bhi to be wafa na mila

sharik-e-hal ab ahbab tak nahin hote

shamim ham ko bhi qismat se kya zamana mila