شام ہوتے ہی چراغوں کو جلانے والے

شام ہوتے ہی چراغوں کو جلانے والے

لوٹ کے آتے نہیں چھوڑ کے جانے والے

تو مری آنکھ کو بھایا ہے مرے دل کو نہیں

تیرے اطوار تو لگتے ہیں زمانے والے

عمر بھر تجھ کو مرا خواب نہیں آئے گا

وصل کی شام مرا ہجر منانے والے

یعنی کچھ روز تجھے چھوڑ کے میں بھی خوش تھا

مجھ کو یہ بات بتاتے ہیں بتانے والے

زندگی آج تجھے چھوڑ دیا ہے ہم نے

ہم نہیں آج ترے ناز اٹھانے والے

تو نے دیکھی مرے ہاتھوں کی مہارت لیکن

وہ مرے پاؤں مرا چاک گھمانے والے

شوق نظارہ لئے آنکھ کدھر جائے گی

حسن والے ہیں ترے شہر سے جانے والے

یہ بھی ممکن ہے ہوا کوئی تماشا کر دے

ہم ترے نام کی شمعیں ہیں جلانے والے

sham hote hi charaghon ko jalane wale

laut ke ate nahin chhor ke jane wale

tu miri ankh ko bhaya hai mire dil ko nahin

tere atwar to lagte hain zamane wale

umr bhar tujh ko mira khwab nahin aega

wasl ki sham mira hijr manane wale

yaani kuchh roz tujhe chhor ke main bhi khush tha

mujh ko ye bat batate hain batane wale

zindagi aj tujhe chhor diya hai ham ne

ham nahin aj tire naz uthane wale

tu ne dekhi mire hathon ki maharat lekin

wo mire paon mira chak ghumane wale

shauq-e-nazzara liye ankh kidhar jaegi

husn wale hain tire shahr se jane wale

ye bhi mumkin hai hawa koi tamasha kar de

ham tire nam ki shamen hain jalane wale