صدائے شوق سکوت لبی سے شرمندہ

صدائے شوق سکوت لبی سے شرمندہ

دروں کا شور مری خامشی سے شرمندہ

کہو تو آج ذرا سا سنوار لوں خود کو

کہ آئنہ ہیں مری سادگی سے شرمندہ

عجیب دوہری عزت کا سامنا ہے انہیں

کوئی کسی سے تو کوئی کسی سے شرمندہ

ہمارے ہاتھ جو دستک نہ دے سکے در پر

ہمارے ہاتھ رہے اس کجی سے شرمندہ

ہم اپنی خاک جہاں میں اڑائے پھرتے ہیں

اے شہر یار تمہاری گلی سے شرمندہ

ہم اس صدی میں بھی منزل سے آشنا نہ ہوئے

یہ اور بات ہے پچھلی صدی سے شرمندہ

ہے میرے پاس یہ لکنت زدہ زباں شاہدؔ

اے خوش کلام تری نغمگی سے شرمندہ

sada-e-shauq sukut-e-labi se sharminda

darun ka shor miri khamushi se sharminda

kaho to aj zara sa sanwar lun khud ko

ke aina hain miri sadgi se sharminda

ajib dohri izzat ka samna hai unhen

koi kisi se to koi kisi se sharminda

hamare hath jo dastak na de sake dar par

hamare hath rahe is kaji se sharminda

ham apni khak jahan mein urae phirte hain

ai shahr-e-yar tumhari gali se sharminda

ham is sadi mein bhi manzil se ashna na hue

ye aur bat hai pichhli sadi se sharminda

hai mere pas ye luknat zada zaban shahid

ai khush kalam tiri naghmagi se sharminda