کسی کی جب سے جفاؤں کا سلسلہ نہ رہا

کسی کی جب سے جفاؤں کا سلسلہ نہ رہا

دل حزیں میں محبت کا حوصلہ نہ رہا

دیار حسن میں ملتی نہیں ہے جنس وفا

دل غریب کا اب ان سے واسطہ نہ رہا

ہوائے یاس نے شمع امید گل کر دی

کسی سے اب کوئی شکوہ بھی برملا نہ رہا

مری نظر کا تقاضا بھلا وہ کیا سمجھیں

کہ حسن و عشق میں پہلا سا رابطہ نہ رہا

اجڑ گیا ہے کچھ اس طرح اب دیار وفا

کہیں بھی میری تمنا کا نقش پا نہ رہا

خودی نہ ہو سکی منت کش نشاط وفا

ہمارا ہاتھ کبھی مائل دعا نہ رہا

کلیمؔ کون مصیبت میں کس کا ہوتا ہے

دیار دوست میں کوئی بھی آشنا نہ رہا

kisi ki jab se jafaon ka silsila na raha

dil-e-hazin mein mohabbat ka hausla na raha

dayar-e-husn mein milti nahin hai jins-e-wafa

dil-e-gharib ka ab un se wasta na raha

hawa-e-yas ne sham-e-ummid-e-gul kar di

kisi se ab koi shikwa bhi barmala na raha

miri nazar ka taqaza bhala wo kya samjhen

ke husn-o-ishq mein pahla sa rabta na raha

ujar gaya hai kuchh is tarah ab dayar-e-wafa

kahin bhi meri tamanna ka naqsh-e-pa na raha

khudi na ho saki minnat kash-e-nishat-e-wafa

hamara hath kabhi mail-e-dua na raha

kalim kaun musibat mein kis ka hota hai

dayar-e-dost mein koi bhi ashna na raha